विराटनगर: सप्तकोशी नदीको बहाव इतिहासकै दोस्रो उच्च बिन्दुमा पुगेको छ । यसअघि कोशीमा सन १९६८ सालमा कोशीमा आजको भन्दा बढी पानी बगेको थियो । सो बेला ७ लाख ८८ हजार २ सय क्युसेक पानी कोशी बाराज हुँदै बगेको थियो ।
आज साँझ ५ बजे कोशीमा ५ लाख ५७ हजार ३० क्युसेक पानी कोशी बाराजमा मापन गरिएको छ । कोशी बाराज कन्ट्रोल रुमका अनुसार ५६ वर्ष यता सप्तकोशी नदीमा पानीको बहाव उच्च भएको जनाएको छ ।
अहिले केही पानी बाराज माथिबाट बगिरहेको छ । २०११ सालमा कोशी सम्झौता भएपछि भारत तर्फ पानी लैजानका लागि इन्टेक बनाउन बाराजको निर्माण भएको हो । बाराज पुरानो भएका कारण पटक पटक खतरा हुने चेतावनी दिइँदै आएको छ ।
जिल्ला प्रहरी कार्यालय सुनसरीका अनुसार पानी बाराज माथिबाट बगिरहेको हो । बाराज हुँदै पूर्व पश्चिम सडक खण्डमा सवारी साधन सञ्चालन हुने गर्छन् ।
पानीको बहाव उच्च भएका कारण दिउँसोबाट बाराजबाट आवतजावत बन्द गरिएको छ । अहिले बाराजका सबै ५६ वटै ढोका खुल्ला गरिएको छ ।
भारतको बिहार सरकार जल तथा संशाधन विभागले आज कोशीमा बाढीको बहाव प्रतिसेकेन्ड ६ लाख ८१ हजार ६ सय ३९ क्युसेक पुग्न सक्ने पूर्वानुमान गरेको छ ।
कोशी आसपास र तटीय क्षेत्रका बासिन्दालाई सतर्कता अपनाउन स्थानीय प्रशासनले आग्रह गरेको छ । प्रहरीले ठाउँ ठाउँमा उद्धार टोली पनि परिचालन गरिएको छ ।
प्रतिक्रिया